1 हे परमेश्‍वर, तपाईंले हामीलाई त्‍याग्‍नुभएको छ, हाम्रा किल्‍लाहरू भत्काइदिनुभएको छ। तपाईं हामीमाथि क्रुद्ध हुनुभएको छ– अब हामीलाई पुनर्स्‍थापित गर्नुहोस्‌।  2 तपाईंले धरतीलाई थर्काउनुभएको छ, र त्‍यसलाई फारिदिनुभएको छ। त्‍यसका धाँदाहरू पुरिदिनुहोस्‌, किनकि त्‍यो हल्‍लिँदैछ।  3 तपाईंले आफ्‍नो प्रजालाई कठिन कुराहरू भोग्‍न लाउनुभएको छ, तपाईंले हामीलाई धरमराउने मद्य दिनुभएको छ।  4 तर धनुको विरुद्ध फहराउनलाई तपाईंको भय मान्‍नेहरूका लागि तपाईंले एउटा झन्‍डा खड़ा गर्नुभएको छ। सेला  5 तपाईंको दाहिने बाहुलीले हामीलाई बचाउनुहोस्‌ र मदत गर्नुहोस्‌, र तपाईंले प्रेम गर्नुभएकाहरूले छुटकारा पाऊन्‌।  6 परमेश्‍वरले आफ्‍नो पवित्रस्‍थानबाट भन्‍नुभएको छ, “विजयमा शकेमलाई विभाजन गर्नेछु, र सुक्‍कोतको बेँसी नापेर छुट्ट्याउनेछु।  7 गिलाद मेरो हो, र मनश्‍शे पनि मेरै हो। एफ्राइम मेरो टोप हो, यहूदा मेरो राजदण्‍ड हो।  8 मोआब मेरो पानीको बाटा हो, एदोममाथि म आफ्‍नो जुत्ता फाल्‍छु, पलिश्‍तमाथि म विजयसाथ कराउँछु।”  9 कसले मलाई किल्‍ला भएको सहरमा पुर्‍याइदेला? एदोमसम्‍म मलाई कसले डोर्‍याउला?  10 हे परमेश्‍वर, तपाईं नै होइन, जसले हामीलाई त्‍याग्‍नुभएको छ, र अब हाम्रा सेनाहरूका साथमा जानुहुन्‍न?  11 शत्रुहरूका विरुद्धमा हामीलाई सहायता गर्नुहोस्‌, किनकि मानिसको सहायता त व्‍यर्थको हुन्‍छ।  12 परमेश्‍वरद्वारा हामी विजय प्राप्‍त गर्नेछौं, र उहाँले हाम्रा शत्रुहरूलाई कुल्‍चनुहुनेछ।